Ik bin in de tuin aan ’t klusse; de höltere loungebanke die al jaore in waer en wind staon meuge ein opknapbeurt gebroéke. Als ik bekans klaor bin kump Miranda mich vraoge of det we dalik met de blaage naor ’t park gaon, naor Feel the 50’s. In d’n haof huuër ik al flarde van de meziék. ’t Waer is good, ik bin haos klaor, dus waorum neet. Ik maak mién klusje aaf, ruum mién gereidschap op, leg mién haor in de bes meugelik vetkuuf en als de gesmaerde bliksem vetrekke we richting park.

Aangekòmme op ’t Gaasplein blinke de oldtimers òs al tegemoot. En in ’t park is de sfeer positief veulbaar aanwezig. Manne met vetkuuve (die kinne det, ik neet), dames in petticoats, leere jasse òndanks de hets, muziek, ein klepke, Venlo op zién bes.

En beej zò’n lekker zunke, lekker windje, lekker waerke huuërt ein iéske, dus gaon ik -geneetend van de muziek- in de riéj staon. De dames wille gaer smurfe-iés met aardbeije-iés, Miranda allein aardbei, en ik gaon veur ’t yoghurt-iés. D’r staon neet vuuël minse veur mich, maar ’t wachte deurt lang.

En waorum? De dame achter ’t iéskräömke haet d’r neet vuuël kieës van gegaete, daorum! Veur ’t schrape van ein bölke iés mòt de schöp wal zes kiér daor d’n bak gehaold waere. En de bölkes die dan in ’t opgedreijde kukske geplek waere hebbe de grueëte die eure priés van € 1.25 neet waerd zién. ’t Schöpke wuuërt neet nao idder bölke efkes daor ’t bäkske water gehaold -wat wal klaor steit, met eine deksel d’r op- dus ’t schöppe lök auk neet. ’t Plek, geit stroef, ’t waere gèn bölkes maar schraapseltjes.

En als ik dan aan de beurt bin geit ’t bestelle met meujte. Veer iéskes, twiéj met idder ein bölke smurfe- én aardbeije-iés, eine met ein bölke aardbei en eine met ein bölke yoghurt. Maar det mòt ik nog ein paar kiér herhaole. ’t Ritueel van schraape en plekke herhaold zich, maar nòw intelik veur mién iéskes. Maar wat deurt det lang…

En als de iéskes intelik klaor zién meug ik aafraekene. Maar ’t oéttelle van veer iéskes met totaal zes bölkes van € 1.25 per stök geit neet zoeë maar efkes, dus raeken ik hardop veur det det € 7.50 beej ein is. Ik gaef eur ein tieëntje en met de € 2.50 die ik truuk kriég excuseert de dame zich det ’t neet zoeë vlot ging, ze stònd heej ònverwachs auk maar efkes veur emus in te valle….

BAM!

Dae kump binne. Inens realiseer ik mich det ik mién oordeil al klaor had. Op basis van wat ik zoog had ik mién oordeil al klaor. Op basis van det ik dach det ik ’t baeter zoel kinne had ik mién oordeil al klaor. Ik had mién oordeil al klaor terwiél ik neet wis wat d’r speulde. Eric, schaam dich!

Ik wis neet det neet d’n oétbater achter ziéne iéskraom stònd, maar ein goodwillende invaller. Met misschiéns minder ervaring. Of zònder gooje instruksies. Zeej haet eur bès gedaon op basis van de informatie en ’t materiaal det ze veur zich had. En ik? Ik veul mich stòm! Wie snel bin ik d’r waer ingetrap. ’t Is minselik, maar toch. De mòs nòw einmaol gèn oordeil velle als’se neet alles euver de situatie wets.

Dus ik antwaord aan de dame, die eur excuses had gemak maar wat eigelik dus gaar neet nuuëdig waas, det ’t neet oétmak. “Als ’t iés maar lekker is”, zeg ik, en det waas ‘t!

En nòw. Nòw staon de sociale media vol met meininge, nae oordeile, euver òs wethalders. Euver ambtenaere en eur functionaere. Òngezalte meininge van minse, die net als ik neet van de hood en de rand weite.

Zién d’r zake fout gegaon in politiek Venlo? Zeker! Hebbe zeej eur zake neet good veur mekaar? Absoluut! Maar ik bin d’r auk van euvertuug det minse neet in ’t stadhoés op ’t pluche gaon zitte um de zaak bewus in ’t hònderd te laote laupe. Ik bin d’r van euvertuug det zeej eur bès doon op basis van de informatie en ’t materiaal det zeej aangedrage kriége. En dan kin ’t toch fout gaon, hiél erg fout. Zoeë fout det zeej eur verantwaordelikheid mòtte neeme en mòtte vetrekke.

Maar wae bin ik um eur dan veur voéle vis oét te make? Eur verwinsinge naor de kop te slingere? Ik haop det ze op ’t stadhoés d’r same good oét gaon kòmme en veur Venlo eur stinkende bès gaon doon. En vaerder laes ik met plaatsvervangende schaamte de meininge van sommige Venlonaere. Eric, schaam dich…

Dit wil ik delen!

AUTEUR

Eric Sweijen (1972) is fotograaf en bedrijfsleider bij Hofleverancier Foto Kino Linders, waar hij ook les geeft in fotografie. In zijn vrije tijd speelt hij dialecttoneel bij Silhouet en zet zich daar behalve als acteur ook in als decorontwerper, vormgever en bestuurslid.

1 reactie

  1. Hiel moei gesproake Eric det zet dich toch aan ut dinke en dan besef se det ze zelluf auk snel ein oordeil euver van alles hes zönder de achtergrond te kinne

Reageren

Yep, ook Krag.nu maakt gebruik van cookies! UITLEG

Alle websites maken gebruik van cookies, Krag.nu dus ook! Het zijn kleine bestandjes die op je computer geplaatst worden en ervoor zorgen dat de website goed werkt. Bovendien helpen ze om Krag.nu te kunnen verbeteren.

Er worden geen privégegevens verzameld!

Deze cookiemelding is verplicht omdat er op Krag.nu filmpjes te zien zijn die op YouTube staan. Daardoor ontvang je mogelijk ook cookies van die website. Wil je dit niet? Pas dan daar je instellingen aan.

Sluiten