Wat gebeurde d’r op 5 december in ‘t jaor…
280
Nicolaas, nog gèn jaor ald, steit rechop in de badkuup met de handjes same um ‘sleevenhiér nog ens te danke veur ’t mirakel van zién gebaorte.
326
Als Bisschop brink Nicolaas dreej kinder waer tot laeve die door eine kwaoje slechter vermaord ware um van eur wors te dreije.
342
Nicolaas biét in eine sappige köfte-burger, neet weitende det dit zién leste aovendmaal zal zién (als hae det geweite had hae de knoeflouksaus van Myra’s burgers neet loate staon; super lekker maar slech veur d’n aom).
743
Nicolaas mak zich -al is’se doeëd- steeds populairder in Europa door wat leuke wòndere te verrichte. Hae wuuërt spraekwaordelik door ’t volk op hand gedrage.
1089
De relikwiéje van (d’n ondertösse heilig verklaorde) Nicolaas zién gejat en euvergebrach naor Bari wao eine basiliek euver zién crypte wuuërt gebouwd. Nicolaas dreijt zich um in zién graaf, want op zién linker ziéj leet hae baeter.
1283
In de volksmònd wuuërt Sint Nicolaas nòw Sinterklaos geneump. Nicolaas vindt zon’ne blitse naam wal kwant.
1344
In d’n hemel verheug Nicolaas zich euver de start van de bouw van de Klaoskerk in Venlo. Martinus lach um oét umdet zién kerk iérder gebouwd én groeëter is.
1421
Erme luuj zette eure schoon in de kerk zoeëdet riéke minse d’r geld of wat lekkers in kinne doon. Ein tradisie is gebaore.
1481
Jungskes gaeve nao de kerkdeens ein speklasiepop aan maedjes um eur ’t hof te make. Als ’t maedje de Klaoskook aanneemp kin ’t vreeje beginne.
1620
Kerkhervormer Maarten Luther verzet zich taege ’t Sinterklaosfees umdet hae vindt det ’t gaeve van kedootjes miér beej kersmis pas.
1732
Sinterklaos wuuërt als eine boeman neergezatte umdet ’t oétbeelde van heilige neet beej idderein in gooje aerd velt. Hae straf stoute kinder met ein ketting.
1749
Naodet duuvels Sinterklaos begeleide duit nòw ein page det. Ziéne naam is Pieter met de Pooten.
1850
Onderwiézer Jan Schenkman guuëf in zién pedagogisch verantwaorde book Sinterklaos eine zwarte knech, eine stoumboeët en d’n intoch. Vertrekke op 6 december duit hae met ein luchbalon.
1945
D’r kòmme steeds miér zwarte piete d’n huijbaard helpe onder leiding van eine hoofdpiet. Ze luustere naor de name Trappaloeli, Jan de Knecht, Nicodemus, Assiepan, Sabbas, Hans Moef, Pikkie, Robbert, Krik-Krak, Sjaak Sjoor en gewoeën Zwarte Piet.
1972
Stoute kinder waere daor de Piete meigenaome naor Spanje um d’r zeip van te make. Wae deze zeip gebroekde is tot op hede neet bekind.
1974
’t Raegend hard in Nederland umdet Sinterklaos in d’n hemel in de bòks pis van ’t lache euver de Snieklaas van Toon Hermans. De wäörd spei, asbak en tante Jo zién vanaaf dae daag in d’n hemel verbaoje door Petrus.
1986
Toekomstig internist Victor Brouwer van Medisch Centrum West dreijt d’n huijbaard binnesteboéte en verklaord um gezònd genòg um nog jaore door te gaon met ’t bliéj make van kinder.
1999
Pieten gaon naor de kapper en laote eur haor òntkroeze. Eur lippe laote ze kleiner make en oérbelle gaon oét. Vraemp genòg laote vuuël dames in die periode eur lippe opspuite en legge eur haor in eine permanent. Euver oérbelle met papegaaje d’r in zulle we maar niks zegge.
2014
De knech van Sinterklaos is gepromoveerd tot helper en meug zich doorum als stroopwaofel laote schmiénke.
2019
Witte Amerigo is veur de nachtelikke ritjes euver de dake vervange door zwarte Ozosnel.
2032
De baard van Sinterklaos is zwart geverf umdet nemus op de waereld nog witte haor meug hebbe umdet albino’s zich beleidig veule.
2047
Schoon waere beej de veurdeur boéte gezatte umdet Sinterklaos neet good euver de dake kin loupe met al die verplichte zonnepanele. Helpers van de belastingdeens kòmme veur det idderein waer wakker is de verplichte SKB (Sint Kedo Belasting) oét de schoon pikke.
2065
De dreej euvergebleve leeje van Kick Out Zwarte Piet viére eur 50-jaorig bestaon met ein kumpke blanke vla.
2192
Alle tekste van de Sinterklaosleedjes waere vervange door lalalalala. Dit um nemus te kwetse, umdet allein historici nog weite wat roe, kapoentje, bonnebonnebonne of tabbert beteikend.
2361
Umdet bliék det in ein vaer verleeje bischoppe dinger deeje met kinder die neet meuge zal Sinterklaos neet miér als Bisschop gekleid gaon, maar als genderneutrale hippe senior met de naam Klaasje.
2588
Door de opwerming van de aerd haet al jaore nemus miér ein verwerming nuuëdig. Dus haet ouk nemus miér ein schouw. Roetvaegpiete demonstrere op ’t Malieveld veur ’t behald van eur baan.
2702
We herdinke det ‘t 750 jaor geleeje is det Mies Bouwman verslaag goof van de 1e op d’n tillevisie oétgezònde intoch van Sinterklaos in Amsterdam. Minse bäöke als ze de beelde truuk zeen; wie haet dit oéjts kinne gebeure. #noéjtsmiérmies
2842
Twiéj-en-ein-half doézend jaor nao zién sterve is Sinterklaos ’t geneuzel miér als zat. Hae steit op oét d’n doeëd en luuët alle kinder van 0 tot 100 jaor waer geluive.
