Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
 

Met vuuël leweid kleppert de breevebus dich. En ik weit oét ervaring det wie harder ’t geluud is, wie kleiner ’t posstök zal zién det met vuuël euvergave òs hoés betraoje haet.

En jaowal huuër. ’t Is maar ein half A4-tje wat nog aan ein puntje in de bus hink. Meistal is ’t dan ein berichje van ‘nne ald-iézerboer dae binnekort waer langs kump, of van emus dae de gäöte wil kòmme schoeënmake. Maar dit kiér is ’t van eine ‘groeëte helderzeende’.

“Voor elk probleem is er een oplossing. Mr. Michael. De grote helderziende”, zoeë velt d’r te laeze op ’t velke pepeer. Ik dink det Mr. Michael zién assistente de breefkes haet laote ròndbringe, want als’se det zelf gedaon zoel hebbe had hae kinne veurzeen det ik um neet gaon belle. Kòs hae zich toch moéj ein half A4-tje bespare.

Euverigges bin ik auk helderzeend… als ik miéne fok op heb. Zònder zeen ik ein stök minder, wat aevel soms auk prettig kin zién.

Maar efkes serieus. Helderzeend. Besteit det ech? Ik kin d’r met volle euvertuuging gèn good antwaord op gaeve. Als neet praktiserend atheïst bin ik d’r van euvertuug det d’r miér is tösse hemel en aerd. Ik kin genòg minse –incluus michzelf– die wal ens dinger hebbe meigemak of ervare die met ’t gezònd verstand neet te verklaore zién.

Ik vraog mich wal metein aaf of weej als mins maar alles mòtte kinne verklaore? Mòtte weej als minsheid euveral ein antwoaord op hebbe? Jao, ik bin zelf auk verduveld niéjsgierig, wil gaer weite wie alles werk en kraak mién herses euver de meis ònmeugelikke vraogstökke die ’t laeve en ’t universum met zich mei kinne bringe. Maar ik heb mich d’r auk allang beej neergelag det neet alles verklaorbaar is. Ik dink neet det de mins d’r is um maar alles te weite.

“Voor elk probleem is er een oplossing” zaet Mr. Michael, de groeëte helderzeende. Det weit ik aevel zoeë net nog neet. Als d’r veur alles ein oplossing is, waorum is d’r dan nog hònger in de waereld? En oorlog? Waorum huuëre weej nog steeds verschrikkelike dinger in ’t niéjs, zoeë als zinloos geweld, aardbevinge, belasting- en andere aanslage. Waorum wuuërt d’r nog steeds genäöld euver de kleur van ein knecht, en mòtte minse zich zörg make of ze volgend jaor nog wal alle raekeninge kinne berappe.

Minse weite nòw einmaol neet euveral ein oplossing veur te vinde.

Döks zién die probleeme auk dinger wao weej als gewoeëne mins maar weinig aan kinne verandere. Die probleeme zién te groeët. Meistal kinne we allein in òzze eige krink ’t gooje veurbeeld gaeve en haope det d’r good gevolg wuuërt. ‘Verbaeter de waereld, begin beej dich zelf’ is zo’n alde wiésheid die nog steeds van toepassing is. Kleine veranderinge kinne gelökkig groeëte gevolge hebbe… maar meistal deurt ’t lang iérdet zo’n positieve verandering op groeëte schaol merkbaar is.

’t Is wat det betref te haope det de groeëte leiders op deze wereld ens helderzeend waere (ze meuge miéne fok wal ens lieëne) en inzeen det ’t vuuël baeter kin. Veur de minse, de bieëster, de natuur, ’t milleu, veur de ganse wereld. Die groeëte leiders hebbe döks miér invloed als weej, de gewoeëne mins. Maar ik bin bang det ’t auk via dae waeg nog wal ens lang zoél kinne deure iérdet we op deze wereld gaon same laeve, in plaats van naeve ein aaf. Veur dees veurspelling hoof’se trouwens neet helderzeend te zién. Det is ein kwestie van gezònd verstand.

Mién gezònd verstand zaet mich auk det beej de iérskòmmende ald-pepeer-ophaoldaag d’r vuuël halve A4-tjes van Mr. Michael in doeëze aan de straot staon. Zoel hae det zelf veurzeen hebbe…?

Dit wil ik delen!

AUTEUR

Eric Sweijen (1972) is fotograaf en bedrijfsleider bij Hofleverancier Foto Kino Linders, waar hij ook les geeft in fotografie. In zijn vrije tijd speelt hij dialecttoneel bij Silhouet en zet zich daar behalve als acteur ook in als decorontwerper, vormgever en bestuurslid.

Reageren