‘Wie haet god de waereld geschape?’ vruuëg Vera mich. De kins wal huuëre det ’t gans in de veurbereidinge veur ziéne iérste kemunie zit. Net als duipe laote weej òs blaage bewus de iérste kemunie doon. Op dees wiés wille weej eur ein stökske traditie meigaeve én ein stökske geluif. Wat ze d’r later vaerder mei wille doon is aan eur, maar ik bin d’r van euvertuug det als’se dich in ’t geluif verdeeps -welk geluif dan ouk- des’se dao neet stòmmer van wuuërs.

Maar det haet met verdeeping in ‘t algemein te make. De kins pas ein gegrònde meining euver iéts gaeve als’se dich iérs in de materie verdeep haes. Zoeë is ’t met geluif, maar ouk met weitenschap. En laote die twiéj zich nou net neet altiéd aeve good verstaon.

Wie haet god de wereld geschape? Ein gooje vraog. Volges de biébel deej hae det in 6 daag, waornao god de 7e daag van de waek terech eine rösdaag noom. Volges de weitenschap is alles begòs met de BIG BANG, de OERKNAL. En op basis van de algemeine relativiteitstheorie is det nòw zo’n 13.8 miljard jaor geleeje. Volges de chronologie van de biébel haet god de waereld rònd 4000 veur de geboorte van ziéne zoon geschape.

Gèn wònder det hae dae rösdaag nuuëdig had als’se ’t werk van 13.8 miljard minus 4000 jaor in 6 daag duis. Dao wuuërs’se begriépelik zoeë meug wie ein maaj van. Ik zoél aan eine rösdaag neet genòg hebbe maar metein van mién pre-pensioen gaon geneete, als ik um waas. Maar ik bin neet um… zeker neet. Want volges die biébel is god alweitend, en ik snap nog steeds eine houp neet.

In alletwiéj de gevalle -OERKNAL en schepping- vraog ik mich namelik ein dink aaf: wat waas d’r veur dae tiéd? Is alles zoeë maar begòs umdet (weitenschappelik) d’r zoeë vuuël instabiele energie waas det de OERKNAL wal meus gebeure of umdet (geluifsgezind) god zoeë allein waas en zich vervaelde en ’t universum gemak haet um wat te doon te hebbe?

En waas god dan veur dae tiéd altiéd allein? Of waas d’r veur dae tiéd allein maar cosmische energie? En wao kump det dan vanaaf? En wie lang waas det al zoeë? En wae of wat haet dan god of die energie dan gemak? Vraoge, vraoge, vraoge…

D’r zién theoriéje det ’t universum eine 4-dimensionale ruimte-tiéd möbiusband is, waobeej alle sterrestelsels oétintelik waer taege mekaar aan knalle en zoeë eine niéje BIG BANG creëre en alles waer euverniéj begint. ’t Universum ruump zich zelf dan op en begint met ein schoeëne lei. In theorie kin ik mich heej good in vinde, maar ik vraog mich wal aaf wie dan dae iérste kiér ontstaon is. Oneindigheid is iéts wat weej als mins geluif ik neet kinne bevatte.

Of is ’t zoeë det god al ens iérder ein universum had geschape en det dao de mins toen eine puinhoup van gemak haet. En is’se toen van gif opniéj begòs met ein schoeëne lei en ein niéj universum, naodet hae de mins iérs terech eine duchtige wats um de oére gegaeve had. Det zoel euverigges in ’t Venloos wal de naam OERKNAL kinne verklaore…

Dit wil ik delen!

AUTEUR

Eric Sweijen (1972) is fotograaf en bedrijfsleider bij Hofleverancier Foto Kino Linders, waar hij ook les geeft in fotografie. In zijn vrije tijd speelt hij dialecttoneel bij Silhouet en zet zich daar behalve als acteur ook in als decorontwerper, vormgever en bestuurslid.

Reageren