’t Is ein moeëj plaetske um te ligge, in ’t bos ònder eine boum. Wao’se ouk kiéks, ’t is greun en d’r greuje paddesteul tot ‘t verrek. Ein klein biétje miézel mak det alles glimp van natigheid. En ondanks det ’t fris is is ’t eine moeëje daag, eine bizòndere daag, eine verjäördaag.
Maar de jäörige is d’r neet miér beej. Alles wat van um euver is zit in ein urn dae ik beej mich draag in ein doeës met nog vuuël miér pötjes, glaeskes en fotorölke-busjes. En die zién allemaol gevuld en van eine naam veurzeen. De urn met as van de jäörige en alle andere pötjes, glaeskes en fotorölke-busjes met zand oét òntelbare lande oét alle waerelddeile. De jäörige waas eine reiziger met de gewuuënte um van euveral wao hae gewaes waas ein biétje zand mei truuk naor hoés te neeme.
’t Zand haet alle meugelikke kleure. We zeen zwart, wit en griés. Dònker gael en broén gemêleerd in wal 50 tinte en ein pötje met hiél moeëj werm roeëd zand van de woestijn in Namibië. Oét sommige pötjes kump zelfs nog de geur van de plaats wao ’t opgeschöp is gewaore. D’n inhald van ’t glaeske met ‘t opschrif ‘Bloubergstrand – Zuid Afrika’ stink naor vis.
’t Is ein moeëj plaetske um te ligge, in ’t bos ònder eine boum. We legge bleumkes beej de as en gedinke eine bizòndere mins. En dan struije we alle pötjes, glaeskes en fotorölke-busjes laeg, gewoeën euver de as. Dao leet hae dan, ònder alle plaatse wao hae oéjts gewaes is. Van ’t griés van de as is bekans niks miér te zeen. Te zeen is ’t witte zand van ’t Bloubergstrand en zwarte grònd oét Bliérick. Dao euverhaer dònker gael en broén gemêleerd in wal 50 tinte en midde d’r op ein hiél moeëj werm roeëd.
We loupe truuk naor de wage um -naor good gebroék- örges van ein tas kòffie met ein stök vlaai te gaon geneete. Maar veurdet we aan kinne riéje waere we verras door ein prachtig gefluit; op nog gènne maeter aafstand van òzze wage zit ein roeëdbörske op eine tak zich de lònge oét ’t liéf te fluite. En vaerder huur’se niks. ’t Klink prachtig zoeë in de stilte tösse de buim en ‘t is kwant um te zeen. Leuke en moeëje bieësjes trouwens, die roeëdbörskes. Dònker gael en broén gemêleerd in wal 50 tinte en midde d’r op ein hiél moeëj werm roeëd…
