Sorry minse, det ik zoeë met de deur in hoés val, maar idderein haet ‘t. Of neet. D’r zién minse die schame zich veur eur haor en gaon door ’t laeve met eine kale piemel of poes. Of doon ze det misschiens um ein andere raeje? Det mak niks. Det mòt idderein zelf weite. Ik heb d’r niks mei te make wat andere doon, maar gelökkig leet d’n tiéd van de Duitse bontmuts wal wiéd achter òs.

Eigelik woel ik gaar neet navelstare -of zo’n 15cm lieëger- maar de blik naor baove richte. Naor ’t köpke. Dao kin ’t auk kaal zién. Bewus of òngewild. En jao, beej mich wuuërt ’t auk minder en daorum hald ik det waat euverbliéf lekker kort. ‘s Morges is det lekker mekkelik; niks te keime, allein ein biétje miér gezich wasse. Dao schaam ik mich niks veur. En haor met karakter velt nòw einmaol leever oét als det ’t griés wuuërt. Laot ik nòw haor mét én zònder karakter hebbe.

Maar d’r zién minse die schame zich d’r wal veur. Veur ein plaat. Veur ein vleispet. Maar dao kinne ze wat aan laote doon; kiék maar naor Gerard Joling. De kins dich net wie um waer häörkes in de kop laote plante. Good verzörge en regelmaotig water gaeve. En als dich det te vuuël meujte is kins’se nog altiéd ein pruuk kaupe.

D’r is aevel ein goodkaupere oplossing.

D’r zién minse die ein reepke haor, zoeë vlak baove ’t oér, laote greuje of eur laeve d’r van aaf hink. En als det dan lank zat is plekke ze die pemele met eine flinke kwak gel of wax, taege de greujrichting in, euver d‘n taets. De häörkes waere dan zoeë breid meugelik neergelag, det d’r maar zoeë weinig meugelik van de bloeëte kieëbus te zeen velt. Voila:  ’t schaamtegeveul is veurbeej.

Aevel hebbe weej in deze tiéd van ’t jaor behuuërlikke windstoeëte. En dan kump ’t wal ens veur -geej veult um al aankòmme- det ’t zorgvöldig gesteeve stökske haor van d’n taets aaf vluug en ònderstebaove aan de andere kant bliéf hange als ein aafdaak veur ’t oér.

Wind – Euverkeimer: 1 – 0

D’n eigenaer, met ’t schaamroeëd op de wengskes, wet neet wie vlot det hae dae waerbörstel waer euver zién schaamteplekske mòt plekke, wat in de häös en door de wind dan auk nòg döks neet lök.

Jao sorry, maar dan mòt ik stiékum toch wal ein biétje lache… kiék, dao vluug ein stökske schaamhaor…

Dit wil ik delen!

AUTEUR

Eric Sweijen (1972) is fotograaf en bedrijfsleider bij Hofleverancier Foto Kino Linders, waar hij ook les geeft in fotografie. In zijn vrije tijd speelt hij dialecttoneel bij Silhouet en zet zich daar behalve als acteur ook in als decorontwerper, vormgever en bestuurslid.

Reageren