Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
 

Simon, Willem, Eduard, IJsbrand, Eduard, Nico. Zoeë spel ik ‘t als minse vraoge wie ze miéne naam mòtte schriéve. En det kump regelmaotig veur. Sweijen is veur vuuël minse klaorbliékelik neet eine naam dae ze gewoeën efkes opschriéve zoeë als Van Gelderen, Verberne of Buwalda. En det is neet erg, want soms mòt ik ouk vraoge wie ik ‘t mòt opschriéve. Wieë vuuël variante van de naam Hendriks kinne we neume met alle meugelikke C-K-X-S combinaties (dao kin Van Strijp zeker ein moeëje formule veur oét d’n aek dreije).

En beej sòmmige name is ‘t ouk leuk um te huuëre wao de naam eigelik -van vruuëger oét- vanaaf kump. Beroepe, plaatsname of familiebande waorte als achternaam gebroék wie in 1810 Napoleon de registratie van naame verplich stelde. Bakker, Van Weerst en Janszoon zién dao duudelikke veurbeelde van. Aevel woéle latere generaties zich misschiens wal aafzette taege zòn’ne gewoeëne kòmaaf, en makde ze d’r Backer, Van Wersch en Jansz van. Det schriéf zich al ein stök sjiéker, neet waor? Maar soms boéjde ‘t neet en waort Janszoon gewoeën Janssen, lekker mekkelik.

Ouk miéne naam, Sweijen, kumps’se op verschillende wiés taege. Sweyen, Sweijn, Sweyn, Swijen en gank zoeë maar door. Wat beej al die variaties de oorzaak is weit ik neet, op eine nao. Mién opa schreef zich Sweijen, maar beej mién pap in de pas steit Sweyen, en zoeë steit ‘t beej mich dus ouk in de offisjeele pepeere. ‘t Verhaol geit det wie mién opa de gebaorte van miéne pap is gaon aangaeve beej de gemeinte, de ambtenaer te lui waas um op zién tiépmesjién ein I en ein J te type (want det zién twiéj aanslaage) en d’r maar ein Y van haet gemak (det is maar eine kiér op ein knuupke houwe). Of det ech zoeë is weit ik neet, maar kwant klink ‘t wal. Aevel bin ik zoeë eigewiés um truuk naor de basis te gaon en miéne naam neet met Y maar met IJ te schriéve.

Truuk naor de basis. Wao leet de basis van miéne naam eigelik? De kins d’r ein gans weitenschappelik ònderzeuk op los laote, maar ‘t kin tiggeswaordig vuuël mekkelikker. En wae haet ‘t neet al ens gedaon? Ziéne eige naam opzeuke op internet. Dan kins’se toch aardig wat taege kòmme, maar of det allemaol klop? Dao kriég’se van nemus garantie op. Ik zoel zoeë maar eine aafstammeling kinne zién van Sweyn Forkbeard, keuning van Denemarken van 986 tot 1014, waobeej hae in de letste jaore ouk nog ens keuning van Noorwege én viéf waeke keuning van Ingeland waas. Van al det is aevel nòw niks miér te zeen of te merke. Örges is ‘t vruuëger good fout gegaon beej òs in de femilie…

Soms geit ‘t fout op ein kwante meniér. Ik reserveerde ens ein täöfelke in ein restaurant veur mich en Miranda, maar d’n eigenaer waas de Nederlandse taal neet zoeë machtig en wis ouk neet wie hae miéne naam meus schriéve, dus heb ik um dae gespeld. Maar wie we beej ‘t restaurant aankwaame um aan taofel te gaon waas d’r gèn täöfelke veur twiéj veur òs. D’r waas ouk gèn reservering op miéne naam. In ‘t restaurant waas ouk nog maar ein taofel vreej en die waas gereserveerd veur 6. En wie ik met d’n eigenaer in de agenda keek um te zeen wat d’r misschiens fout waas gegaon snapde ik ‘t. ‘t Stònd netjes genoteerd; ein reservering veur Simon, Willem, Eduard, IJsbrand, Eduard en Nico.

Dit wil ik delen!

AUTEUR

Eric Sweijen (1972) is fotograaf en bedrijfsleider bij Hofleverancier Foto Kino Linders, waar hij ook les geeft in fotografie. In zijn vrije tijd speelt hij dialecttoneel bij Silhouet en zet zich daar behalve als acteur ook in als decorontwerper, vormgever en bestuurslid.

Reageren